Maxamed Siciid Dabeyl: Ururkayaga UGUB Liiska Ururadda Puntland waxaa ka saartay Dawladda.

Waxaa durba soo baxaysa dhaleeceyn ka imaaneysa Ururka UGUB oo kamid ahaa Ururadda looga dhawaaqay Puntland kaas oo doonayey inuu Isbadel u keeno Shacabka sida ay sheegeen Madaxda UGUB.

Guddoomiyaha Kumeelgaarga ah ee Ururka UGUB Maxamed Siciid Dabeyl oo maanta la hadlay Saxaafadda gudaha ayaa sheegay in Ururkooda UGUB looga saaray Hannaanka Dimuqraadiyadda arrimo Qabiil,taasina ay tahay wax laga Xumaado.

Waxa uu sheegay in Mu’aamarada lagu sameeyey Ururkooda UGUB ay ka danbeysay Xukuumadda Madaxweyne Cabdirixmaan Maxamed Faroole,waxa uu intaas ku daray in habka Qabaliga ee la rabey in laga gudbo aysan macquul noqon karin inta Mu’aamadahan ay jiraan.

…”"”Mu’aamaradaasi waxay ku dhisantahay oo ay tahay arinta aanu dooneynay inaanu ka saarno oo ahaa arrimaha Qabaliga,waxaa loo badelay si aan looga bixin ayaa waxaa la Mu’aamaradeeyey Ururka,waxaana Mu’aamaradeysay Xukuumada…”“ayuu yiri Maxamed Siciid Dabeyl.

Maxamed Siciid Dabeyl ayaa ka dhawaajiyey in jiritaanka Ururkooda UGUB uu baaqi kusii ahaan doono Puntland weligiisna uusan dhacayn ayna ka shaqeynayaan daha Ummada reer Puntland.

Mar la weydiiyey in arrintan looga soo saaray Ururada Puntland iney kala hadleen Guddiga Kumeelgaarga ah ee Doorashooyinka Puntland ayuu sheegay in ay la socodsiiyeen balse faah- faahin aysan bixin.

Guddiga Kumeelgaarga ah ee Doorashooyinka Puntland oo Shir Saxaafadeed ku qabtay shalay magaaladda Garoowe ayaa shaaca ka qaaday in Wajigii 1-aad ee Isdiiwaan-gelinta uu soo Gabagaboobay isla markaana ay soo baxeen 6-Urur Siyaasadeed,kuwaas oo kala ah.

01. Ururka HORSEED

02. Ururka MIDNIMO.

03. Ururka WADAJIR.

04. Ururka Dadka Puntland[UDAD]

05. Ururka Dimuqraadiyada Puntland [PDP].

06. Ururka Hormarin iyo Cadaalad

[HORCAD].

Guddoomiyaha Guddiga Maxamed Xasan Barre ayaa sheegay in Ururadan ay soo buuxiyeen Shuruudihii looga baahnaa kuwaas oo si rasmi ah uga mid noqonaya kuwa u tartamaya Golayaasha deegaanada.

______________________________________________________________
Nagala Soo Xiriir E-mail-kan
hablahamedia@gmail.com.
Waanu Tixglindoona Wixii Macluumaad Ah Oo Aad Inoo Soo Gudbiso
Sidoo Kale Taladaadu Waa Muhiim Fadlan Inoo Soo Dir Ayadana
F.G. Comments-yada Waa Ka Mamnuuc Caay Iyo Aflagaado , Qabyaaladna Warkeeda Daa.