Malaayiin Muslimiin ah Xujey ah ayaa maanta u taagan Banka Carafo

maalinta carafah oo ah maalinta ugu weyn
acmaasha xajka

Malaayiin Muslimiin ah Xujey ah oo ka kala socda Caalamka daafihiisa ayaa maanta u taagan Baanka Carafo, iyadoo inta badan dunida Muslimka laga sooman yahay maalinta sagaalaad ee bisha Dulxaj.

Xujeyda Sanadkan ayaa waxaa ku jira Soomaali badan oo ka kala timid gudaha Soomaaliya iyo dalalka kale ay ku nool yihiin, waxaana sanadkan lagu qiyaasay tiradii ugu badneyd ee Soomaalida ka soo xajisa.

Saaka ayaa Xujeyda ka soo kalaheen halka lagu magacaabo Mina, oo xalay ku hoydeen, waxaana ay u dareereen Banka Caraf si ay u gutaan waajibaadka ugu muhiimsan ee Acmaasha Xajka.

Ducada maalinta carafah

Maanta oo ah Sagaalka Carafo ayaa ah maalintii la dhameystiray Soo Degista Qur’aanka Kariimka waana maalin ahmiyad gaar ah u leh Muslimiinta Dunida meel waliba oo ay joogaan.

Boqortooyada Sacuudiga Carabiya ayaa sanadkan adeegyo cusub ku soo kordhisay Xajka, iyadoo meel walba la dhigay gawaarida gurmadka deg dega, sidoo kale meel walba oo 1-KM ah waxaa laga sameeyay goobo caafimaad, si qofkii xanuun dareema loogu daaweeyo.

Kumanaan isugu jira Boolis iyo Ciidamada loo yaqaano Taraafikada ayaa kala hagaya xujeyda, waxaana meelaha qaar ku diyaarsan baabuurta qaadi laheyd dadka waayeelada, sidoo kale waxaa jira gawaari lagu diyaariyay raashin iyo cabitaano meel walba yaala.

Soomaalida sanadkan nasiibka u yeelatay inay xajiyaan ayaa u sheegay Warbaahinta kala duwan in Umada Soomaaliyed ugu soo duceynayaan in dhibaatada alle ka saaro, Nabad, barwaaqo iyo kala dambeyn Alle u keeno.

Sanadkan ayaa la filayaa inay yaraato qasaaraha ka dhasha isbuurashada marka la Dawaafayo, waxaana sanadihii u dambeysay ay aheyd mid sii kala yaraaneysay, maadaama wax badan laga bedelay qaab xujeyda u xajiyaan, adeegyo kala duwana lagu soo kordhiyay.

Muslimiinta oo isugu tagat buurta carafah

Ilaa iyo hada waxaa la soo wariyay in labo ruux Soomaali ah ay geeriyootay, inta aanay bilaaban gudashada Xajka, Oday Soomaaliyed ayaa jiiray Gaari, halka qof dumar ahna xanuun ay la dhimatay, waxaana waxyaabaha layaabka ahaa ay aheyd in Haween Xujey ahaa ay ku umuleen Hotelada ay degenaayeen.

Maalinta Beri ayaa ah maalinta Ciidul Adxa ee Xoola Qalka waa maalin ay si aad u faraxsan yihiin Muslimiinta Caalamka meel waliba oo ay aduunyadu ka joogaan.